9. โอปมฺมสํยุตฺตํ
1. กูฏสุตฺตวณฺณนา
[223] กูฏํ คจฺฉนฺตีติ กูฏจฺฉิทฺทสฺส อนุปวิสนวเสน กูฏํ คจฺฉนฺติฯ ยา จ โคปานสิโย โคปานสนฺตรคตา, ตาปิ กูฏํ อาหจฺจ ฐาเนน กูฏงฺคมาฯ ทุวิธาปิ กูเฏ สโมสรณาฯ กูฏสฺส สมุคฺฆาเตน วินาเสน ภิชฺชเนนฯ อวิชฺชาย สมุคฺฆาเตนาติ อวิชฺชาย อจฺจนฺตเมว อปฺปวตฺติยาฯ เตน จ โมกฺขธมฺมาธิคเมน ตทนุรูปธมฺมาธิคโม ทสฺสิโตฯ อปฺปมตฺตาติ ปน อิมินา ตสฺส อุปาโย ทสฺสิโตฯ
กูฏสุตฺตวณฺณนา นิฏฺฐิตาฯ
2. นขสิขสุตฺตวณฺณนา
[224] เอวํ อปฺปกา ยถา นขสิขาย อาโรปิตปํสุ, สุคติสํวตฺตนิยสฺส กมฺมสฺส อปฺปกตฺตา เอวํ เทเวสุปีติ หีนูทาหรณวเสน วุตฺตํฯ อปฺปตรา หิ สตฺตา เย เทเวสุ ชายนฺติ, ตญฺจ โข กามเทเวสุฯ อิตเรสุ ปน วตฺตพฺพเมว นตฺถิฯ
นขสิขสุตฺตวณฺณนา นิฏฺฐิตาฯ